Министерот за надворешни работи, Никола Димитров, денес го прими новоименуваниот амбасадор на Република Косово во Република Македонија, Ѓерѓ Дедај, кој ги предаде копиите од акредитивните писма за неговото именување како вонреден и ополномоштен Амбасадор на Република Косово во Република Македонија.
Министерот Димитров, на амбасадорот Дедај му посака срдечно добредојде и успех во неговата дипломатска мисија во насока на понатамошниот развој на блиските и пријателски односи и соработката меѓу двете соседни земји.
На средбата беше искажана подготвеност од двете страни за натамошно градење добрососедски односи, интензивирање на дијалогот и унапредување на соработката на билатерален и регионален план. Министерот Димитров и амбасадорот Дедај разменија мислења и за актуелни надворешно-политички прашања од регионален интерес.