Вчеравечер во Куманово повторно се одржа собир на опозицијата, на која се обратија градоначалникот на Куманово, Зоран Дамјановски, пратениците Гордан Георгиев и Соња Мираковска, портпаролот на ЛДП, Филип Јаневиќ и еден стечаец.
-Ме обвинувате дека јас не соработувам со вас. Јас работев толку, колку што ми дозволуваше буџетот, бидејќи не одвоивте повеќе пари за нашиот град. Седум години владеете со оваа држава и седум години го лажете народот. Потрошивте седум милијарди евра повеќе, од која било влада во историјата на Македонија, а не вложивте ништо во овој крај, изјави градоначалникот на Куманово, Зоран Дамјановски.
Пратеникот Гордан Георгиев нагласи дека ќе му покажат на премиерот Груевски, дека на 24-ти декември не беа исфрлени само 42 пратеници, туку и половина македонски народ.
-Такво исфрлање на улиците, историјата нема забележано од 17-ти век, па се до 24-ти декември кога лажни полицајци исфрлија пратеници на улици. Опозицијата заедно со своите поддржувачи, народот ќе остане и ќе се бори за демократијата и за своите барања. Ние ќе ги искористиме сите легитимни можности за да создадеме услови за предврмени избори, изјави Георгиев.