Ќе настапуваме како една пратеничка група, постоењето на повеќе групи не наиде на она што очекувавме, наидовме на непочитување на деловникот и недавање можност да се искаже сето она што требаше, рече новиот координатор на пратеничката група на ВМРО-ДПМНЕ, Никола Мицевски.
Тој додаде дека од поодамна било планирано прегрупирање од десет во една група, а официјално утре ќе го известат претседателот на Собранието, Талат Џафери.
„Остануваме на ставот дека ќе настапуваме во Собранието како и досега, против целата штетна политика на СДСМ“, рече Мицевски на прашање дали ќе оди на координација кај собранискоот спикер.
За законот за амнестија очекува да биде прифатен од мнозинството. „Ќе имаме повторно координација во партијата, она што беше понудено како помирување не е прифатливо бидејќи е селективно“, рече тој.
Мицевски не одговори дали ќе соработува со новата пратеничка група која независна од ВМРО-ДПМНЕ. „Дел од пратеничките дадоа оставки, но остануваат во пратеничката група“, рече тој.
Мицевски денеска ја презеде функцијата од Драган Данев кој рече дека оставката ја поднел од лични причини.
Галена Николовска-Ризвановиќ