Министерот за надворешни работи Никола Димитров ќе учествува на „Состанокот на Основната група на Минхенската безбедносна конференција“, што се одржува од денеска до четврток во Минск.
– Предвидено е министерот Димитров да има излагање на тематските панели посветени на односите Исток-Запад, транснационалните закани и регионалните безбедносни предизвици, соопшти македонското Министерство за надворешни работи.
Состанокот е организиран во партнерство со Владата на Белорусија и ќе обезбеди неутрална платформа за политичка дебата. Околу 70 лидери ќе разговараат за безбедносните предизвици во Источна Европа и евроатлантскиот регион. Учесниците на состанокот ќе расправаат за сегашните изгледи на Минск процесот за ставање крај на конфликтот во источна Украина, иднината на односите меѓу Исток и Запад, ерозијата на конвенционалните договори за контрола на нуклеарното оружје во евроатлантскиот простор, сегашната состојба на регионалните конфликти, како и за одржливоста на економскиот модел на Источна Европа.
Настанот обединува истакнати учесници на највисоко ниво од повеќе региони во светот, вклучително и високи претставници од ЕУ, ОБСЕ и НАТО.
На маргините на настанот, министерот Димитров се предвидува да оствари и повеќе билатерални средби.