Производителот на луксузни автомобили на хибриден погон,компанијата „Фискер“, заради финансиски проблеми веќе шест месеци нема направено ниту еден примерок од моделот „Карма“, иако, според најновите информации, компанијата е на добар пат да излезе од моменталната криза.
Финансиската помош на „Фискер“ може да му пристигне од кинеската група „Wanxiang“. Кинезите неодамна ја купија компанијата „A123 Systems“ во која се произведуваат литиум-јонските батерии за моделот „Карма“.
Во изјавата за Блумберг претседателот на групацијата „Wanxiang“, Пин Ни, изјави дека во интерес на кинеската компанија е да му се помогне на „Фискер“ во обнова на производството. Тој не потврди дека неговата групација планира директни инвестиции во „Фискер“, но не ја отфрли можноста за формирање стратешки сојуз меѓу двете компании.
Претставникот за медиуми на „Фискер“, Роџер Ормишер, одби да ја коментира оваа вест, но кажа дека многу потенцијални партнери покажале интерес за соработка со овој производител на автомобили.