Три години откако група истражувачки новинари поднесоа тужба против Европскиот парламент затоа што европратеници одбиле да откријат на што ги трошат своите додатоци, Европскиот суд на правда денеска застана зад Европарламент оценувајќи дека европратениците немаат обврска да бидат транспарентни околу дополнителните надместоци.
На одлуката веќе реагираше невладината организација Транспаренси Интернешнл нарекувајќи ја „длабоко разочарувачка“, јави дописничката на МИА од Брисел.
Судот во образложението на својата одлука се повикува на аргументот за заштита на приватноста.
Во 2015 година групата истражувачки новинари побараа транспарентност од ЕП за начинот на кои европратениците ги трошат разните додатоци кои им следуваат, како на пример, патните трошоци.
Европскиот суд на правда оцени дека постои ризик за приватноста и интергритетот на пратениците, бидејќи „побараните документи содржат информации“ за нив и фактот што личните податоци се тесно поврзани со јавните податоци „не значи дека тие податоци не можат да бидат окарактеризирани како лични податоци“.
Иако највисокиот европски суд прифаќа исклучоци на ова правило, тој оцени дека во овој конкретен случај условите не биле исполнети и дека не гледа доволно причини на новинарите да им даде пристап до побараните документи.
– Желбата да се отвори јавна дебата не може да биде доволна за да ја покаже потребата за трансфер на лични податоци, бидејќи тој аргумент е поврзан само со целта за пристап до документите. За крај, барателите не докажаа дека трансферот е соодветен и пропорционален на бараната цел, наведе Судот во своето образложение да не им даде пристап на новинарите до информациите за дополнителните трошоци на европратениците.
Европратениците покрај нивната месечна бруто плата од 8.611 евра, примаат 4.416 евра месечно за дополнителни трошоци.
Новинарите во 2015 година поднесоа тужба пред Судот поради одбивањето на Европарламентот да им даде пристап, во рамките на новинарски истражувачки проект, до начинот на кој европратениците ги трошат своите додатоци.
Новинарите поднесители реагираа дека одлуката на Судот „директно ги храни скептиците на ЕУ“.
– Ова покажува дека единствените избрани политичари во ЕУ се посебна класа и не одговараат пред никого, најмалку пред јавноста, реагираше една од новинарите, Анушка Делич.
Таа додаде дека Судот ги копирал аргументите на Европарламентот, прашувајќи „што правеле“ судиите три години додека одлучувале за случајот.
– Без разлика на одлуката јас сум уверена дека сме во право. Јавното трошење на европратениците треба да биде отворено за јавноста како секој трошок освен воениот и разузнавачкиот, изјави Делич.
Таа потврди дека новинарите ќе ја обжалат пресудата.