Од денеска со колони автомобили низ Скопје, граѓаните предводени од опозицијата ќе го изразат отпорот и револтот против, како што велат, ненародниот режим и диктатурата на власта.
Колоната автомобили предводени од лидерите на опозицијата во 12 часот ќе појде од пред салата „Јане Сандански“ и ќе се движи кон Ново Лисиче, од таму ќе се приклучи на булеварот „Јане Сандански“ и ќе продолжи во насока на Народна банка на Македонија.
Караванот продолжува покрај „Црвен крст“ и врти во правец на Собранието на Република Македонија. Од таму покрај гимназијата „Јосип Броз Тито“ кон „Теодосије Гологанов“, колоната ќе продолжи се до „Порта Влае“. Колоната продолжува по „Партизански одреди “ до Соборниот храм и се вози до Владата.
Од „Сојузот за иднината“ велат дека ова ќе се случува и во наредните седум дена. Нагласуваат дека враќање нема, и дека отпорот ќе трае се додека не се врати легитимитетот на институциите, кој беше погазен на 24. декември. А излез од кризата, велат, е можен само преку предвремени парламентарни избори, на кои граѓаните ќе одлучуваат во каква Македонија сакаат да живеат, во диктатура или слобода.