Општинската изборна комисија (ОИК)-Штип почна со подготовките за спроведувањето на референумот на 30 септември. Претседателката на ОИК-Штип, Сенка Андреева вели дека ќе се формираат вкупно 77 Избирачки одбори наместо 80, заради припојувањето на жителите од три штипски села, каде има помалку од 10 гласачи, кон најблиското избирачко место.
Исто така, избрани се и нови членови во Избирачките одбори, кои доаѓаат на местата на државните службеници, кои заминале во пензија.
– Околу 40-тина луѓе заминаа во пензија. Тие не смеат да учествуваат во ваква ситуација, како што е изборниот процес, додаде Андреева.
Избирачките одбори на претстојниот референдум имаат вкупно шест членови, бидејќи се работи за референдумско изјаснување, а не за изборен процес, политичките партии не можат да делегираат свои претставници.
-Излезе Правилник, според кој немаме политички партии во избирачките одбори. Значи, ако беа 10 души, четворица излегуваат, остануваат само шест, вели Андреева.
Избирачките одбори ќе бројат вкупно 462 лица, а не 800 како на последните локални избори и сите членови ќе бидат од редовите на државната администрација.