Општина Крива Паланка ќе додели стипендии на осум спортисти од градот кои тренираат и се натпреваруваат во спортските клубови од општината. Спортските стипендии ќе се доделат за прв пат, а се наменети за четити основци и четири средношколци.
Објавен е конкурсот за доделување стипендии за спортисти – ученици во основните училишта на подрачјето на Крива Паланка и средните училишта од земјава за учебната 2018/19 година, а целта, според одговорните е да се зголеми мотивираноста кај младите талентирани спортисти, како и поддршката во развој и унапредување на младинскиот и училишен спорт.
Право на стипендија имаат државјани на Република Македонија кои имаат статус на редовен ученик во основните училишта на подрачјето на општина Крива Паланка и средните училишта од државата.
Услови за конкурирање се: кандидатите да се жители на Крива Паланка, да се ученици во основните училишта на подрачјето на општина Крива Паланка и средните училишта од Република Македонија, да се активни спортистки и спортисти, членови на спортски или училишни клубови регистрирани на подрачјето на општина Крива Паланка и да се регистрирани во националните спортски федерации во Македонија, да имаат високи спортски постигнувања во претходната 2017 година и во 2018 година, се до завршување на јавниот повик.
Одбраните осум стипендисти ќе добиваат стипендија во износ од 3.000 денари, девет месеци во учебната 2018/2019 година.
Апликантите покрај горенаведените потребни документи, во поднесените пријави треба да ги исполнуваат целите и критериумите доставени во прилог на јавниот повик што е објавен на официјалната веб страница на општина Крива Паланка.
Во постапката за распоредување на буџетските средства за стипендирање на спортисти во учебната 2018/2019 година, ќе влезат во изборот оние апликанти кои врз основа на критериумите ќе обезбедат најмалку 50 од можни вкупно 100 бодови.
Пријавувањето на јавниот повик се врши со доставување на пополнета посебна пријава достапна во архивата на општина Крива Паланка, а може да се преземе од официјалната веб страница на Крива Паланка, со придружни документи пропишани со правилата.
Рокот за поднесување пријави и документи е од 24 септември 2018 година до 5 октомври 2018 година, а истите треба да се достават директно во архивата на општина Крива Паланка најдоцна до 05.10.2018 година до 15:00 часот на последниот ден од завршувањето на Јавниот повик, со назнака: „Јавен повик за доделување стипендии на спортисти – ученици во основните училишта на подрачјето на општина крива паланка и средните училишта од Република Македонија“.
Резултатите ќе бидат објавени на огласна табла во Општина Крива Паланка и на веб страницата на општината њњњ.кривапаланка.гов.мк во рок од 8 дена од денот на завршување на конкурсот.Дополнителни информации може да се добијат во општината.