Со Одлука на Советот на општина Крива Паланка, донесена на 13-та седница, граѓаните и приватниците можат бесплатно да ги користат јавните површини за време на претстојните празници во градот, големите традиционални фестивали и патрон-празникот на Крива Паланка, св.Јоаким Осоговски.
Од службата за информирање при општината потенцираат дека со Одлуката за бесплатно користење на јавните површини за време на претстојните празници, одреден е периодот од 24 до 29 август 2018 година, а за оваа намена одредени се локации кои по јавно објавување ќе бидат распределени на принципот прв пријавен, прв услужен.
Повикот важи за сите регистрирани субјекти во сферата на угостителството и трговијата, од општината, но и од соседните општини.
Во периодот од 24 до 29 август во општината ќе се одвиваат поголем број традиционални, дел од нив и повеќедневни културни манифестации: Интернационален фолклорен фестивал „Св.Јоаким Осоговски“, рок-фестивал „Џојфест“ со гостување на Рибја Чорба, концерт на Јелена Томашевиќ, централна прослава за Денот на рударите, празнување на верскиот празник Голема Богородица и патрон-светецот на градот свети Јоаким Осоговски, на 29 август.
Пријавување за користење на јавнитe површини се врши во Одделението за урбанизам, сообраќај и заштита на животна средина во локалната самоуправа на општината.