Болницата за гинекологија и акушерство никогаш не вратила ниту една родилка која немала документи, и секоја, независно дали е венчана или не, во рок од 36 часа добива извод за новороденчето, изјави за „Макфакс“ директорот на струмичката болница, Наќе Гогов, кој вели дека известувањето дека родилките мора задолжително да понесат извод од венчаните е утрово отстрането.
Според него, известувањето за кое имаше бурни реакции на социјалните мрежи и беше протолкувано како дискриминирачко го ставил некој од вработените веројатно без да размисли убаво за содржината.
„Струмичката болница е дел од проектот ‘Добредојде бебе’ и најодговорно тврдам дека никогаш не се случило некоја родилка да биде вратена бидејќи не поседува некој документ. Болницата на сите, без исклучок дали се венчани или не, во рок од 36 часа им издава извод на новороденчињата. Сметам дека известувањето беше протолкувано надвор од контекстот, но се согласувам дека не е соодветно напишано и утрово го тргнавме“, ни рече Гогов.
Имено, написот на кој вчера имаше бурни реакции на социјалните мрежи го содржеше следниов текст: „Пациентките кои доаѓаат на Акушерско одд. за породување ЗАДОЛЖИТЕЛНО со себе да донесат извод од венчаните“.
Во интегралното известување што го испратија до нашата редакција а од кое е изваден спорниот текст пишува: „Се известуваат сите родилки дека нашата болница е дел од Проектот на Министерството за здравство ‘Добредојде бебе’ и секоја родилка најдоцна 36 часа по породувањето може да поднесе да ѝ биде издаден извод за новороденчето преку болницата. За сите информации може да се обратите кај одделенската сестра на Акушерија или кај администраторот на Мој термин на 076/787-020 (Коле). Потребни документи за издавање извод на новороденче се: Копија од извод на венчани / копија од извод на родени од мајката (ако е самохрана мајка), копија од лична карта на двајцата родители (или копија од пасош), платежна картичка (од која се наплаќаат 50 денари за извод и 100 денари административна такса).
Ана Василева