Владата во изминатата година паралелно ги туркаше и внатрешните реформи и надворешната политика, изјави премиерот Зоран Заев на прес-конференцијата со генералниот секретар нан НАТО Јенс Столтенберг, запрашан за критиките во јавноста дека Владата не се посветила доволно на домашните реформи, туку на надворешната политика.
– Слушаме за критиките дека многу сме се насочиле на дипломатските мисии, посебно решавајќи ги проблемите со Бугарија и Грција, но паралелно ги теравме реформите. Првата фаза од реформите ја поминавме, заедно со опозицијата се гласаа реформите во правосудството, сега следуваат втората и третата фаза. Конечно имаме цело време да биде посветени на реформите и економијата, рече Заев.
Оцени дека поканата за НАТО и отворањето на патот за преговори со ЕУ ќе придонесат исто така за тој дел.
– Верувам дека мотивацијата, како кај мене така и кај целата Влада, ќе биде и во сите институции во Република Македонија, но и кај нашите граѓани, знаејќи дека имаме што да сработиме дома, сите со своите обврски и задолженија. Јас сум убеден дека дефинитивно нешто вредно за кое се бореле генерации од осамостојувањето на Македонија, конечно го имаме на дофат, додаде премиерот.
