Непознати сторители синоќа урнале летниковец поставен покрај станбени објекти на улицата „Младинска“ во Струмица, во близина на ОУ „Никола Вапцаров“, соопштија денеска од ЈПКД „Комуналец“.
Покрај урнувањето на летниковец мета на вандалите била и опрема во Детското игралиште во Градскиот парк во Струмица.
– Ваквата општествена неодговорност и чин на вандализам не води никаде. Неретко се случува откако ќе се обнови комуналната опрема, несовесни граѓани повторно да ја уништат. Апелираме до граѓаните да пријават вандалско однесување и да споделат информации за уништување на заедничкиот имот, апелираат од ЈПКД „Комуналец“.
Инаку, од почетокот на годината се евидентирани голем број уништувања на урбана опрема во центарот на градот, посебно на Плошадот „Гоце Делчев“, каде беа искршени огромни жардинерии за цвеќе.