Протестот организиран од група граѓани „Млади за Македонија“ кој се одржува пред Собранието против промена на името, започна со молитва. Насобраните испратија порака дека само господ знае за Македонија и да и помогне на државата да ги спаси од „лукавиот“.
Тие носат транспаренти „Никогаш Северна, секогаш Македонија“ и повикуваат на разумност со цел да се зачува уставното име.
Пред Собранието во центарот на Скопје може да се забележи и зголемено присуство на полиција. Поради протестот сообраќајот на улиците „Даме Груев“ и „Васил Главинов“ во правец кон „Црвен крст“ и обратно од крстосница „11 Октомври“ и булеварот „Кочо Рацин“ е пренасочен.
Министерството за внатрешни работи апелираше граѓаните да се воздржат од преземање на насилни активности за да се сочува јавниот ред и мир.
На протестот не смее да се дозволи да има луѓе со фантомки на главите, порачуваа организаторите од студентското движење „Млади за Македонија“. На социјалните мрежи тие ги повикаа граѓаните ако забележат лице со фантомка, да му ја симнат и да го предадат на полиција. Тие нагласија дека по никоја цена не се дозволени напади на полицијата.
Кристијан Ландов