Штипската детска градинка „Вера Циривири-Трена“ од денеска почна со акција за обновување на детските реквизити и оградите на дворовите на четирите објекти.
Акцијата почна од штипско Ново село, каде што вработени и родители на децата учествуваа во акцијата, а боите за фарбање им се донација од фирмата „Гудмарк“.
– Нашата компанија со своите партнери ја продолжува традицијата со донирање на нашите добро познати производи. Со оваа донација имаме за цел да ја обновиме заштитната ограда на сите четири клонови на детската градинка „Вера Циривири Трена“, а со тоа и да го разубавиме секојдневниот простор на дечињата кои престојуваат во нив, изјави Нада Гроздановска, од компанијата.
Директорката на градинката „Вера Циривири-Трена“-Штип, Софка Атанасова рече дека во текот на летото со средства од Министерството за животна средина и просторно планирање ќе се обновата садниците, клупите и корпите за отпадоци во дворовите на објектите, а со финаниска помош на ТИКА ќе се изврши и реконструкција на објектот „Развигорче“ во населбата Автокоманда.
– Продолжуваме со реконструкција на градинката „Развигорче“ во населбата Автокоманда, каде ќе биде сменета кровната конструкција, тоалетите, шкафчињата, а исто така и вратите, вели Атанасова.