Денеска Општина Штип учествуваше во проектот „Future of Europe – Reload“. Настанот започна во 10:00 часот во ОМЦ „Киро Глигоров“ во Штип каде свое поздравно обраќање имаше градоначалникот на Општина Штип, Благој Бочварски, а потоа свое претставување имаа и градоначалниците од градовите од седум различни земји-членки во Европската унија и тоа од: Aksakovo(Бугарија), Setubal (Португалија), Ozarow Mazowiecki (Полска), Nughedu Santa Vittoria (Италија), Victoria (Романија), Monserrat (Шпанија).
„Денеска имаме можност како град да бидеме домаќини на Меѓународната конференција Future of Europe – Reload, којашто е дел од проектот „Обединета Европа“, во којшто Штип е вклучен заедно со градови од шест земји – членки на Европската Унија. Општина Штип е домаќин на делегации од градовите: Монтсерат во Шпанија, Викторија во Романија, Сетубал во Португалија, Нугеду Санта Виторија во Италија, Озаров Мазовиецки во Полска и Аксаково во Бугарија. Во рамки на денешните активности се одржаа сесиите “We are proud to be Europeans”, односно „Горди сме што сме Европјани“ и “Euroscepticism and its role for the future of Europe”, односно „Евроскептицизмот и неговата улога за иднината на Европа,“ изјави градоначалникот Бочварски.
На денешниот настан присуствуваше и амбасадорот од Република Словенија во Република Македонија, Милан Јазбец кој исто така имаше свое обраќање на тема „Горди сме што сме Европјани“. На овој настан свое обраќање имаа и д-р Блажо Боев, ректор на Универзитетот „Гоце Делчев“ во Штип и претседателот на Совет на Општина Штип, Јане Миланов на тема „Евроскептицизам и неговата улога за иднината на Европа“. Како завршен дел од настанот беше заедничкиот ручек и посета на тврдината Исар.