Градоначалникот на Охрид Јован Стојаноски денеска имаше средба со шестчлената делегација на кинескиот град Далиан предводена од заменик-градоначалничката Вен Зукионг.
Во кинеската делегација се директорот на културното биро во Далиан, директорот на Образовното биро и претседател на Стручно-техничкиот колеџ, како и заменик-директорот на Канцеларијата за надворешни работи.
На средбата било разговарано за интензивирање на соработката со кинеската општина, што иницијално би била насочена кон соработка во областа на културата, преку размена на музички ансамбли што би учествувале на културните настани во двете држави. Била разгледувана и можноста за отворање на кинески културен центар и фондација, за промоција на кинеската култура во Македонија.
Исто така станало збор и за соработка во образованието преку размена на ученици и професори. Во наредниот период гостите од Далиан ќе ги посетат културно–историските знаменитости на градот, како и одредени институции со кои е предвидено остварување на соработка во иднина.