Делегација од општина Штип утре заминува во посета на бугарската општина Стражица. Раководителот на Секторот за јавни дејности во општина Штип, Билијана Казанџиска вели дека делегацијата ќе биде составена од 60 лица од институциите во општината, ученици, спортисти, невладини организации и културни работници.
– Нашите претставници ќе учествуваат на повеќе настани, меѓу кои опфатена е промоција на македонските традиции, со фокус на локалните традиции во Штип, гастрономијата, образовните перспективи, спортските успеси и слично. Претставниците од образовните институции ќе имаат можност да остварат соработка на полето на пронаоѓање партнерски институции за аплицирање на проекти од европските фондови. Исто така, наши претставници ќе имаат можност да учествуваат во дебата на којашто ќе се зборува за европските перспективи на земјата и регионот, вели Казанџиска.