Третиот меѓународен натпревар-„Гастро мак 2018“ годинава повторно ќе се одржи во Струмица во периодот од 8 до 12 октомври.
Ова го соопштија денеска на прес-конференција претставници од Асоцијацијата на готвачи и шефови на кујни од Македонија-„Гастро мак“.
– Светската гастрономска јавност со месеци зборуваше ви суперлативи за минатогодишниот настан, тука во Струмица, така што и оваа година мораме да го одржиме и да го надминеме заслуженото реноме. Со домаќините, градот Струмица и Хотелот „Вила Парк“, сигурни сме дека и оваа година ќе направиме настан за долго паметење, рече Адријана Алачки, претседателка на „Гастро мак“.
Градоначалникот Коста Јаневски истакна дека со овој настан Струмица уште повеќе станува препознатлива.
– За општина Струмица и за мене како нејзин градоначалник, ова претставува чест и задоволство, бидејќи третиот интернационален гастрономски натпревар-„Гастро Мак Македонија 2018“ ќе биде уште една алка во синџирот од меѓународни манифестации со кои Струмица се гордее и е препознатлива надвор од границите на нашата земја, рече градоначалникот на Струмица, Коста Јаневски.
Од „Гастро мак“ најавуваат дека на големиот кулинарски настан ќе присуствуваат над триста учесници, натпреварувачи, судии и почесни гости.
Натпреварот се одржува под мотото „Залче од светските вкусови“, а логистички е поддржан Светската организација на шефови кујни.