Општина Струмица денеска почна со асфалтирање на улици во населените места Свидовица и Муртино.
Според градоначалникот на Струмица Коста Јаневски, кој денеска присуствуваше на асфалтирањето во селото Свидовица, жителите од овие места заслужуваат подобра инфраструктура.
– Во населеното место Свидовица во тек е асфалтирањето на една од улиците, која што самите жители на нашите средби со нив ја посочија како една од приоритетите. Можам да најавам дека и во населеното место Муртино се асфалтираат три улици. Улицата тука во Свидовица е во должина од околу 300 метри, а во Муртино се три помали улици, кои што имаат вкупна должина од 250 метри, рече градоначалникот на Струмица, Коста Јаневски.
Тој најави дека општина Струмица почнува и со реализирањето на програмата во градот со уредување на тротоарите. Предвидени се пет тротоари, кои во прва фаза ќе бидат уредени со површина од околу 600 метри квадратни.