Mитрополитот дебарско-кичевски и плаошки, владика Тимотеј во изјава за „Макфакс“ вели дека не е точно дека МПЦ побарала промена на името, но не го дава писмото испратено до Вселенската патришаршија, со обраложение дека за тоа треба да одлучува Синодот.
„Точно е дека се бараше само автокефална црква, сето друго се неточни информации“, изјави Тимотеј.
На барањето да го добиеме писмото испратено до Вселенската патријаршија, владиката Тимотеј рече дека тоа не е возможно, бидејќи за тоа требало да се одлучува на седница на Синодот.
„Која институција вам ви дава преписка? Мислам, ме разбирате. Тоа е невозможно”, вели владиката Тимотеј, додавајќи дека и во изминатите денови ги демантирале овие гласини во медиумите.
„Ромфеа“, едно од највлијателните црковни гласила во Грција објави дека Македонската православна црква (МПЦ-ОА) испратила писмо до Вселенската патријаршија преку кое бара промена на своето име. Како што е наведено, МПЦ-ОА наводно побарала ново име, кое нема да го содржи терминот Македонија, а според посоченото, МПЦ-ОА побарала свое преименување во „Охридска и на Јустинијана Прима архиепископија“.
Информацијата за испратеното писмо ја потврди и Вселенската патријаршија, која преку соопштение истакна дека освен барањето на МПЦ-ОА, писмо пристигнало и од македонскиот премиер Зоран Заев, кој побарал од Синодот на Вселенската патријаршија да ја врати МПЦ-ОА во канонскиот поредок под името Охридска архиепископија.
Кристијан Ландов