Општина Штип во функција ги става урбаните заедници, кои подолго време се напуштени и запоставени, со што граѓаните не добиваа никакви информации. Кристина Костова советник за информирање во кабинетот на градоначалникот на Општина Штип на денешната прес-конференција истакна дека во текот на изминатиот период на транспарентен начин биле избрани новите раководства на Урбаните заедници во Штип.
– Советот на урбаните заедници има мандат од четири години, а во изминатиот период преку транспарентна постапка беа избрани нови раководства, односно нови членови и претседатели на Советите на урбаните заедници. Преку Советот на урбаната заедница, граѓаните можат да даваат иницијативи и предлози кои се од јавен или локален интерес до надлежните органи во Општината, вели Костова.
Таа најави дека градоначалникот на Општина Штип, Благој Бочварски средбите со граѓаните ќе ги остварува во нивните населби, односно Урбани заедници, а на кои што ќе можат да ги презентираат своите проблеми и потреби.
– Средбите со граѓаните на ниво на урбани заедници најчесто ќе се случуваат во попладневните часови, за да можат сите граѓани да имаат можност да присуствуваат на нив. За средбите, граѓаните ќе бидат информирани преку раководствата на урбаните заедници, преку дневните билтени на Општината и преку социјалните мрежи, вели Костова.