“Намалувањето на употребата на дизел горивата е светски тренд и голем број градови во светот веќе најавија забрана за дизел возила во централните зони. Ова е само една од многубројните мерки за намалување на аерозагадувањето кое потекнува од сообраќајот, паралелно со мерките за намалување на аерозагадувањето од загревањето на објектите, градежништвото и индустријата. Според Светска банка, аерозагадувањето во Македонија е причина за над 1300 смртни случаи и ги чини нашите граѓани преку 253 милиони евра годишно”-истакна Морачанин.
Со цел намалување на аерозагадувањето и борба против климатските промени, голем број држави најавија забрана за продажба на нови автомобили кои користат бензин или дизел од 2030, односно 2040 година. Собранието на Република Македонија го ратификуваше Парискиот климатски договор, со што презема обврска за намалување на емисиите на стакленички гасови.