Единаесет проценти од средношколците и студентите, кои биле анкетирани користат дрога, покажа анкетата на студентите од Правниот факултет. Ангела Димевска студент од Правниот факултет при Универзитетот „Гоце Делчев“-Штип вели дека дрогата најчесто ја користат момчињата, наместо девојчињата, а во делот на статусот, сиромашните и богатите се предаваат на овој порок.
Најчесто злоупотребувана дрога е марихуаната, но исто така имаме и проценти на злоупотребување на лековите за смирување и исто така испитаниците одговориле при ова истражување дека најчесто опојните дроги се злоупотребуваат на музичките фестивали, ноќните клубови и на изолирани периферни места, вели Димевска.
Истражувањето покажува дека 40 отсто од младите знаат за штетноста од користењето на дрогите, но забележуваат дека до неа и лесно се доаѓа.
– Во нашето истражување заклучивме дека поголем број од студентите имаат пристап до опојните дроги, повеќе за разлика од средношколците. Студентите и средношколците се информираат за штетноста на опојните дроги преку различни презентации, обуки, медиуми, интернет и преку комуникација со родителите, а најмалку информации добиваат од своите матични лекари, додаде Сања Стојчевска студент на Правен факултет
Универзитетскиот професор Страшко Стојановски вели дека направиле и споредба со истражувањето од 2015 година, при што анализите покажуваат дека новите резултати се загрижувачки и треба да бидат алармантни за институциите.
– Имаме пораст на злоупотребата на опојни дроги, особено, кај категоријата студенти и друг сериозен индикатор е и тоа што во делот на злоупотребата на опојни дроги оние, кои што се посилно психотропно дејство се повеќе се злоупотребуваат, од некаде околу 2 отсто пред три години, сега расте дури на 12 отсто , вели Стојановски.
Една третина од испитаниците одговориле дека во нивното најблиско опкружување има лица кои се корисници на дрога, а 60 отсто пак одговориле дека имаат подалечни познаници кои користат дрога. Резултатите од истражувањето се достапни за сите институции, а при анкетирањето се опфатени околу 400 средношколци и студенти од целиот источен регион.