Државниот секретар во Министерството за здравство, Владимир Милошев денеска ги посети Здравствениот дом во Ресен и Заводот за превенција, лекување и рехабилитација на хронични респираторни, неспецифични и алергиски заболувања–Отешево.
Од Министерството за здравство информираа дека на средбата со раководството и стручниот колегиум во Отешево се разговарало за актуелните проблеми, пред сè од инфраструктурен аспект, и во таа насока државниот секретар најавил дека е планирана реконструкција на овој објект која треба да почне во септември годинава и да се реализира во следните две години.
Во Здравствениот дом во Ресен, Милошев остварил работна средба со стручниот колегиум, на која станало збор за актуелните состојби во оваа здравствена установа, како и можностите за подобрување на условите за работа и лекување.