Амбасадата на САД во Скопје денеска во просториите на Американското катче организираше следење на свечената инаугурација на претседеталот Барак Обама која се одржа во Вашингтон по повод почетокот на неговиот втор претседателски мандат.
– Претседателот Обама во својот инспиративен говор спомена бројни предизвици со кои треба да се соочи Америка во следниот период. Предизвици стојат и пред Македонија и се надевам дека во наредните месеци и години ќе работиме заедно како партнери, рече американскиот амбасадор Пол Волерс по свечената инаугурација на Обама.
Свеченото стапување на должност на Обама што се одржа пред Капитол Хил во Вашингтон се проценува дека го следеле над 800 илјади лица.
Пред четири години инаугурацијата по повод неговиот прв мандат во Белата куќа го следеа 1,8 милиони Американци.
Инаку, Американското катче е преселено во нови простории во Националната универзитетска библиотека „Свети Климент Охридски“ и треба официјално да почне со работа во четврток.