Двесте талентирани ученици од сите средни училишта од Македонија денеска учествуваат на 54. Државен натпревар на младите истражувачи што се одржува во СОУ „Димитар Влахов“ во Струмица.
Учениците се натпреваруваат во 23 области од техничките и природните науки.
Државниот натпревар е во организација на Народна техника на Република Македонија.
– За нас оваа година е плодна. Мината недела се одржа 55 натпревар на младите природници и истражувачи од Република Македонија, а денес 54 натпревар на младите истражувачи. Најуспешните напреварувачи ќе можат своите проекти да ги претстават на манифестациите кои ќе ги организраме до крајот на годината-„Макинова Технома“ во октомври, а во ноември, по повод Светскиот ден на науката, ќе го организираме и Меѓународниот натпревар на земјите од Југоисточна Европа, рече во своето поздравно обраќање претседателот на Народна техника на Македонија, Зоран Тодоров.
Државниот натпревар на младите истражувачи за отворен го прогласи претседателот на Советот на општина Струмица, Марјан Даскаловски, а на свеченото отворање присуствуваа претставници на Владата и министерството за образование и наука.