Прилеп ќе се збратимува со општина Источно Сараево, ќе ги зголемува културната и туристичката соработка, а стопанствениците ја поздравуваат иницијативата за формирање бизнис клуб кој ќе им го зголеми извозот, констатираа на денешната средба амбасадорот на БиХ Лепа Бабиќ, прилепскиот градоначалник Илија Јованоски и бизнисмените од Регионалната стопанска комора.
– Разговаравме за културните настани што не поврзуваат. Прилеп ќе се збратими со општина Источно Сараево. Со задоволство ја прифативме понудата и мило ми е што ќе почнеме заедничка соработка, рече Јованоски.
Според Горан Попоски од прилепската Регионална стопанска комора, компаниите и досега имаа добра економска соработка со нивните колеги од Босна и Херцеговина, а формирањето на бизнис клубот на ниво на Македонија, оцени, ќе ги зголеми контактите меѓу бизнисмените од двете страни.
Досегашната трговска размена меѓу двете земји е околу 150 милиони евра, а односот на увозот и извозот е 50:50.
– Само во 2017 година размената е десет отсто зголемена. Констатиравме дека и прилепските стопанственици се за формирањето бизнис клуб за зголемување на трговската размена. Тоа ќе го преземат стопанските комори на Босна и Херцеговина и Македонија, а ќе се вклучат и амбасадорите. Инаку, босанскиот пазар ги бара македонските производи од прехранбената индустрија, металургијата, шумарството, кочанскиот ориз, а БиХ кај нас извезува млечни производи. Она што е посебно важно што сме пред потпишување на спогодбата од областа на туризмот и тука очекуваме голема соработка, изјави амбасадорката Бабиќ.
Од прилепската конфекција „Хатра“ велат дека имаат одлична соработка и пласман во БиХ, а од „Конфи Ангел“ нагласуваат дека формирањето на бизис-клубот ќе ги приближи контактите и ќе може да се пласираат производи во БиХ.
За градоначалникот Илија Јованоски е битно што соработката со Босна и Херцеговина ќе се подигне на повисоко ниво и во стопанскиот сектор.