Ректорите на Штипскиот универзитет и Универзитетот за применети науки од Урошевац Блажо Боев и Агрон Бајрактари денеска потпишаа договор за соработка.
Бајрактари истакна дека соработката ја гледаат преку заеднички проекти, што ги овозможуваат фондовите на ЕУ за поголема мобилност на студентите и наставниот кадар, а како Универзитет за применети науки се фокусирани во машинството, технологија на дрва и туризам.
Тој забележа дека тие како универзитет имаат блиска соработка со стопанството и се обидуваат да ги задоволат нивните барања во делот на кадарот.
– Само што потпишавме договор за соработка со УГД и соработката ќе ја насочиме во областите на внатрешен дизајн, архитектура, машинство и економија. Добро е да се биде овде и ние сме многу горди што сме во овој познат универзитет, не само во Македонија, туку и во регионот. Се познаваме со ректорот од претходно, а сега веќе можеме да започнеме прекугранични проекти меѓу Македонија и Косово, рече Бајрактари.
Ректорот на УГД-Штип, Блажо Боев истакна дека добро е што двата универзитети почнуваат да соработуваат во делот на приментите науки.
-Тоа е еден универзитет, кој беше дел од универзитетот во Приштина, а сега е независен универзитет во Косово и мислам дека нашата идна соработка е во делот на заедничка проектна активност, во делот на ИНЕТРАГ, Кросборд програмите, вели Боев.
Двајцата ректори најавија дека во следниот период ќе аплицираат заеднички за реализација на проекти преку Еразмус плус Програмата.