Градоначалникот Шилегов во рамките на работната посета во Виена денеска имаше средби со Градоначалникот и Претседател на Покраината Виена д-р Михаел Хојпл.
На средбата, градоначалниците дискутираа за развојните визии на новото градско раководство, како и за идеите и праксата што Виена може да му ги пренесе на Скопје на ова поле. Исто така, на средбата беа разменети и искуства за градското зонско паркирање и паркинг просторот во двата градови.
Шилегов во текот на денешниот ден, оствари средба и со заменик- градоначалникот на Виена, Марија Василаку, која е одговорна за урбанизам и сообраќај, заштита на животна средина, енергетско планирање и учество на граѓаните во креирање јавни градски политики во Виена. На оваа средба, Шилегов и Василаку разговараа за јавниот транспорт и негово ефикасно воспоставување, за проектите на споделување велосипеди, како и за развојот на Скопје во енергетско ефикасен, зелен и паметен град.
Покрај овие две средби, градоначалникот Шилегов се сретна и со раководителот на Туристичкото здружение на Виена, Норберт Кетнер, и пратеникот на Покраинското собрание Омер – Ал Рами.