Опшинската организација на Црвен крст во Велес денеска го одбележа претстојниот празник, 17 март Денот на Црвениот крст на Република Македонија и Ден на доброволното дарување крв.
Трансфузиологот и активст Славе Јорданов, во своето обраќање, потсети дека веќе 40 години ООЦК од Велес е меѓу трите најуспешни во државата.
– Во 2017 година собрани се 4.110 крвни единици со што планот од 1.861, е остварен со 220,84 проценти. Посебно радува фактот што се зголемува бројот на крводарителите жени од кои лани се собрани 804 крвни единици или 19,56 проценти од вкупниот број. Важно е да се истакне дека 67 проценти од крводарителите се млади до 30 години, а првпат крв дарувале 571 дарител од кои најголем број средношколци од велешките училишта преку организирани акции за доброволно дарување крв, потенцира Јорданов.
Во знак на благодарност, унапредување и омасовување на крводарителството за 2017 на свеченоста им беа врачени благодарници на Металната индустрија „БРАКО“ од Велес, на ООУ„Блаже Конески“ од Велес на Основната организација на Црвен крст од Населба Градско и на Елизабета Николовска.
Воедно десетмина крводарители добија плакети за 50 пати дарувана крв. За 75 пати дарувана крв плакети добија крводарителите Даниел Митев, Слободанчо Петрушев и Тодор Хаџиристов. За 100 пати дарувана крв плакети добија Димче Арсов, Звонко Карталов и Петре Митревски.