На денешната средбата со премиерот Зоран Заев разговаравме за безбедносната состојба на Балканот, проблемот за името кој го имате со Грција и евро-атлантските интеграции на Македонија. САД и понатаму ќе се ангажираат и ќе учествуваат во процесот за влез на Македонија во ЕУ и НАТО, изјави Вес Мичел, помошникот државен секретар за европски прашања на Стејт Департментот на САД по средбата со премиерот Заев.
Тој истакна дека датумот за влез на Македонија во ЕУ и НАТО не е фиксен и зависи од интересите на Европската Унија, НАТО и Македонија.
– Вратата за влез во НАТО за Македонија останува отворена. Заедно со премиерот Заев и понатаму ќе работиме на унапредување на процесот, рече Мичел.
Помошникот државен секретар на САД изјави дека Македонија преземала големи чекори напред во однос на членството во ЕУ и НАТО и ја охрабрува државата да продолжи со истото темпо.
Денешната посета на американскиот помошникот државен секретар за европски прашања на Стејт Департментот на САД, Вес Мичел, е втора дестинација во рамките на неговата турнеја низ земјите на Западен Балкан. Мичел вчера беше во посета на Косово, а задутре ќе отпатува во Атина, каде ќе се сретне со претставници на грчката влада, со кои ќе разговара за продлабочување на односите меѓу САД и Грција, проблемот со името со Македонија и билатералната соработка за зајакнување во областите на одбраната, енергетиката, трговијата и инвестициите.
Виктор Јованов