Министерот за надворешни работи Никола Димитров, денес во Брисел, на инаугуративна церемонија го означи возобновувањето на активностите на Групата „Пријатели на Република Македонија” во Европскиот Парламент, предводена од холандскиот евро-пратеник Ханс ван Баален, од редовите на АЛДЕ.
„Пријатели на Република Македонија” е неформална група, составена од пратеници во Европскиот Парламент од различни политички групи, која во изменет и проширен состав по пауза од речиси три години, ја динамизира својата работа.
Групата е замислена како своевиден форум на обезбедување поддршка на Република Македонија во нејзините европски аспирации и цврста поддршка на нејзиниот европски пат.
Министерот Димитров пред присутните евро-пратеници, изјави:
„Вашата поддршка за нашите напори да изградиме демократска, стабилна, просперитетна и европска Република Македонија, е значајна и мотивирачка”.
„Обновувањето на работата на групата „Пријатели на Македонија“ по три години од нејзиното формирање, е вистински сигнал за поддршка на новото лице на Република Македонија: демократско, фокусирано кон иднината и европско”.
„Би сакал да одадам признание на Европскиот Парламент за придонесот кон нашите напори за трансформација на нашето општество; голема благодарност што сте со нас и во добро и во лошо”.
„Вашата поддршка е инвестиција за европската иднина на нашата земја и регионот”.
„Групата пријатели на Македонија ќе има недвојбено значајна улога во претстојниот период, одлучувачки за нашата европска кандидатура. И покрај тоа што ова е извонреден состав, се надевам дека бројот на пријатели на Македонија постојано ќе расте”.
За време на настанот, МНР Димитров оствари куси разговори со неколку евро-пратеници.
