Со годинашната програма на секторот Паркови и зеленило на јавно претпријатие „Комуналец“, Крива Паланка предвидено е да бидат засадени над 25.000 корени цвеќе на јавните површини во општината.
Раководителот на секторот, Драги Пејчиновски, информира дека тековно околу 16.000 корени цвеќе се одгледуваат во фолиите на претпријатието.
– Согласно временските услови, во моментот во фолиите каде од сопствено производство, од семка до корен, се одгледуваат околу 16.000 корени цвеќе: повеќе видови петунии, импатиас, целосија, винка, хризантеми и други видови кои зависно од сезоната ќе бидат засадени во три турнуси во тектот на целата година. Кон крајот на 2017 и од почетокот на годинава на цветните површини во градот засадени се љубичици, примула-јаглики, околу 2.000 корени, а до крајот на годината ќе се одгледаат вкупно 25.000 корени цвеќе, изјави Пејчиновски.
Рече, дополнително, во фолиите се одгледуваат и 1.000 корени зимзелени дрвца и грмушки, кои исто така ќе ги разубават јавните површини во општината.
– Покрај производство и засадување цвеќе, Секторот паркови и зеленило работи и на уредување на цветни форми и декорации во кејот на реката, на неколку локации во градот, во мајор коритото на Крива Река, спроти градскито парк – кај обиколницата и други. Направени се неколку гамбиони со мермерен камен, кај т.н. Пазарска патека, кај паркот и декоративната фонтана, на вливот на Дурачка во Крива Река, кои дополнително ја разубавуваат сликата на градот, додава Пејчиновски.
Инаку, екипи на ЈП Комуналец на иницијатива на градоначалникот на oпштината, Борјанчо Мицевски, за одржување чиста и здрава животна средина, со Одделението за инспекциски надзор работи на расчистување на одредени простори и состојби во градот кои повеќе години го нарушуваат естетскиот изглед на Крива Паланка, во централниoт реон и во приградските населби.