Македонија не може да има напредок во насока кон ЕУ, ако партиите и етничките заедници се поделени. Ние имаме потреба од соработка и повторувам дека Македонија на почетокот беше пример. Сега се надевам да таа земја не се претвори во грижа, рече претседателот на Европскиот парламент Мартин Шулц одговарајќи на прашањето од дописникот на МИА од Стразбур, за тоа како гледа на политичкиот конфликт меѓу опозицијата и владејачкото мнозинство во Македонија. При тоа, тој повика на соработка меѓу сите партии.
Како што пишува МИА, претседателот на групата на Социјалистите и демократите Јоханес Свобода за перспективите на Македонија да добие датум за преговори за време на ирското претседателство рекол дека „се зависи од начинот на кој ќе бидат решени проблемите и конфликтите во земјата“.
– Тоа сега е прашање меѓу две партии со голем конфликт во Парламентот, бидејќи знаете дека не прифаќаме почеток на преговори со земји кои се силно политички поделени меѓу партиите од владината коалција и опозицијата. Потребно е да се промени ова и да се најде компромис и заедничка позиција на двете најголеми парламентарни групи во Македонија. Засега сите претставници на ЕУ бараат од двете страни да пронајдат решение, јас лично телефонски ќе раговарам со Црвенковски, но не можеме да најдеме решение однадвор. Потребно е да се убедат двете страни да најдат решение и да создадат услови опзицијата да се врати во Парламентот – нагласил Свобода за Дојче веле.
Според Грахам Ватсон од групата на европските либерали и демократи, на Македонија сега и е потребен и внатрешен компромис.
– Потребно е сега сите партии во Македонија да работат да се најде решение, во ЕП постои загриженост по она што се случува во Македонија од пред неколку недели. Се надевам дека сите елементи на општетството, ќе работат заедно за да осигураат членство на Македонија во ЕУ – рекол поранешниот претседател на групата на европските либерали во ЕП, пренесе МИА.