Министерот за надворешни работи на Република Македонија, Никола Димитров денес оствари прва средба со амбасадорот на Канада во Република Македонија, Кетлин Чаба, по нејзиното стапување на функцијата на крајот на јануари оваа година.
Посакувајќи успех во дипломатската мисија, министерот Димитров изрази очекување дека за време на нејзиниот мандат во Република Македонија, односите и соработката меѓу двете земји ќе бележат нагорен развоен тренд.
На средбата се разговараше и беше потврден заемниот интерес за унапредување на билатералната соработка во повеќе конкретни области, ставање значаен фокус на економската соработка во претстојниот период, како и натамошно продолжување на успешната мултилатерална соработка.
Амбасадорот Чаба ја пренесе канадската поддршка на реформската агенда на Владата на Република Македонија и ги поздрави надворешно-политичките активности кои земјата ги презеде во изминатиот период.
Канада ја очекува Република Македонија како 30-та земја членка на НАТО, тоа ќе биде значаен придонес кон стабилноста и безбедноста на Република Македонија, но и на целиот регион.