СДСМ до Владата и до Комитетот за реформи во јавната администрација при Владата на Република Македонија, поднесе иницијатива со предлог мерки за целосна реформа на јавната администрација.
„ Соочени со фактот дека администрацијата во Македонија е пренатрупана, партизирана и неефикасна, сметаме дека е неопходно да се преземат мерки за крупни реформи.Јавната администрација е сервис за граѓаните и огледало за функционална држава. Ваквата поставеност на државните служби го отежнува животот на граѓаните и затоа расте нивното незадоволство“, изјави потпретседателот на СДСМ, Ана П.Данева.
Мерките кои ги предлага СДСМ, се однесуваат на три елементи во реформите – подобрување на капацитетот на администрацијата, подобрување на условите за работа и мерки за заштита од партизација.
СДСМ предлага конкретни проекти со кои ќе се прават обуки на административците, ќе се тестира нивното знаење, ќе имаат флексибилно работно време, ќе им се израмнат платите, ќе се вработуваат и ќе напредуваат според заслуги, без уцени и партиска книшка.
„Ако Владата застане против мерките, таа не застанува против опозицијата, таа им застанува на патот на граѓаните при остварување на правото за брза и квалитетна услуга. Ние како партија нема да се откажеме од мерките за реформи и ќе продолжиме со иницијативи до институциите. Но Владата е таа која треба да застане зад проектите и заедно на граѓаните да им го олесниме пристапот до административните услуги”, рече Данева.