Два случаи на грабеж на минувачки низ Тетово регистрилала полицијата во текот на вчерашниот ден.
Како што информираше денеска портпаролот на СВР Тетово, Марјан Јосифовски, при првиот случај околу 6 часот и 20 минути додека одела на работа по улицата „Никола Тесла“ тетовчанката В.П(58) била пресретната од непознато лице, кое насилно се обидел да и ја одземе чантата. Напаѓачот извадил нож и и се заканил дека ќе го употреби.
– Во чантата таа имала здравствени и банкарски картички, лична карта и една платежна картичка, изјави Јосифовски.
Вториот сличен настан бил забележан околу 13 часот на улица „Маршал Тито“ при што на жителката на Тетово М.Б(49) и се доближило непознато лице и веднаш и го грабнало паричникот по што брзо избегало. Во паричникот таа имала 100 евра, 200 денари, лична карта и платежна картичка. И двата случаи биле пријавени во полицијата која работи на откривање на идентитетот на сторителите.
