Петнаесетгодишно момче од село Стајковци е повредено во вчерашниот инцидент во скопската населба Ченто. Од МВР првично информираа дека се приведени 15-тина лица, но утрово соопштија дека бројот на приведени е 20.
„Вчера околу 19.35 часот во Единицата за информации и команда Скопје, возач во ЈСП пријавил дека на улица Алија Авдовиќ имало тепачка помеѓу две групи малолетници. Притоа, едната група го каменувала автобусот со број 65-б, кој сообраќал на релација Транспортен центар-Брњарци, од што биле искршени четири стакла од вториот кат на автобусот. Еден камен го пробил стаклото и удрил 15-годишник од село Стајковци, Скопско“, информира МВР.
Во врска со настанот, во полициската станица Гази Баба биле приведени 20 лица од двете групи. Полицијата презема мерки за целосно расчистување на случајот.