Ирена Попова, советничка на Град Скопје од ВМРО-ДПМНЕ денеска во изјава за медиумите рече дека денеска на дневен ред, предложен од градоначалникот Шилегов, е поставена точка за поскапување на цената на водата на жителите на градот Скопје.
– Се предвидува етапно цената на водата во Скопје да поскапи за цели 35% што по поскапување на цената на нафтата ќе преставува нов ценовен шок за граѓаните. Значи со овој предлог Скопјани наместо 12 ќе плаќаат 16 сметки за вода годишно. Ако плаќале домаќинствата 1.000 денари месечно по поскапувањето ќе треба да плаќаат 1.350 денари. Скопјани ќе треба да го плаќаат луксузирањето на СДСМ и Шилегов, додека градот Скопје се соочува со неефикасност, неработа и најзалудно потрошените први 100 дена од работата на било кој претходен градоначалник на Скопје, без ниту еден отпочнат капитален проект, рече Попова.
Таа додаде дека по притисокот од јавноста, владата излезе со препорака во однос на одлуката за покачување на цената на водата. Како што кажа Попова, тоа е доказ дека покачувањето на цената на е реалност, наспроти обидите за правдање на градоначалникот Шилегов и Град Скопје.
– Советниците на ВМРО-ДПМНЕ и Коалицијата „За Подобра Македонија“ се против покачување на цената на водата, и бараме до предлагачот да ја повлече точката од дневен ред. Недомаќинското работење не смее да биде на грбот на скопјани. Скопјани не смеат да бидат осиромашувани и да ја плаќаат со свои пари неспособноста на СДСМ и градоначалникот Шилегов. Апелираме на носење на одлука со која е се заштитат интересите на Скопјани.