Актуелната состојба во обвинителствата, идната редовна комуникација, потребата од размена на искуства, заедничката определба и подготвеност за соработка со цел поефикасно гонење на сторителите на кривичните дела, беа теми на кои се говореше на првата средба помеѓу јавниот обвинител на Република Македонија, Љубомир Јовески и специјалната обвинителка Катица Јанева.
Како што информираат од обвинителството, на работниот состанок одржан вчера во просториите на Јавното обвинителство на Република Македонија, станало збор и за актуелните реформи во правосудниот систем и неопходната активна вклученост на јавните обвинителства.
„Јовески и Јанева ги разгледаа прашањата опфатени со претстојните измени во законите со кои се регулира кривичната материја, особено во однос на поставеноста и организацијата на обвинителствата. При тоа беше потенцирано значењето на меѓусебната поддршка и почит со цел успешна реализација на суштинските реформи кои ќе придонесат за подобрување на улогата на јавниот обвинител во целокупниот правосуден систем во државата“, се додава во соопштението.