Иако важи за ексклузивен произведувач на автомобили чија годишна продукција е значително помала од повеќето автомобилски компании, Ролс-Ројс во последната деценија бележи значителен пораст на продажбата од година во година.
Во 2007 година првпат испорача преку 1.000 возила за една година, 2010 ја заврши со 2.700, а 2014 со преку 4.000 продадени автомобили.
Минатата година оствари поскромен резултат, а причините за падот на продажбата треба да се бараат пред се во отстуство на моделот Фантом од Ролс-Ројс. Имено, компанијата уште во 2016 година го прекина производството на моделот Фантом купе и Дропхед Купе (кабриолет), а на почетокот од 2017 и лимузинската верзија на Фантом.
Со оглед на тоа дека производството на новата генерација почна неодамна, Ролс-Ројс во 2017 година во понудата имаше еден модел помалку, што за произведувач со мал број модели во понудата претставува голем хендикеп.
Ако се знае дека Ролс-Ројс годишно испорачува меѓу 300 и 1.200 Фантоми (кога го има во понуда) резултатот од 3.362 продадени автомобили во 2017, со 16-процентен пад, и не е така лош како што изгледа на прв поглед.
Сепак, компанијата во 2018 година влегува со оптимизам и очекува нов продажен рекорд со оглед на тоа што на светскиот пазар пристигнува новиот Фантом, а се најавува и премиера на првиот теренец (SUV) во историјата на брендот.