Буџетот на Општина Струмица за наредната година ќе изнесува 19 милиони и 650 илјади евра што е за седум проценти повеќе од овогодинешниот буџет.
Основниот буџет изнесува 9,4 милиони евра, а со него, локалните власти очекуваат реализација на голем број договорени проекти со граѓаните, како и на Буџетските форуми.
– Ова е дефинитивно развоен Буџет кој почива на реални очекувања. Го креиравме приходниот дел врз основа на сигурни податоци. Иако е за седум проценти поголем од Буџетот за 2017 година очекувам висок процент на реализација. Потенцијалот на Струмица е секако поголем, но ние креиравме остварлив Буџет со кој ќе реализираме голем број капитални проекти. Општина Струмица е позната по партиципативното учество на граѓаните, така и ги креиравме приоритетните проекти. Секако, ги ислушав внимателно и дел ги профатив и предлозите на советниците на коалицијата предводена од ВМРО ДПМНЕ, зошто и нивните сугестии произлегуваат од потребите на граѓаните, рече градоначалникот Коста Јаневски.