Во касарната во Петровец денеска ќе се одбележат пет години од хеликоптерската несреќа кај Катлановско Блаце во која на 12 јануари 2008 година загинаа 11 припадници на АРМ кои се враќаа од мисијата „АЛТЕА“ во Босна и Херцеговина.
На одбележување ќе присуствува заменик-министерот за одбрана Емил Димитриев кој воедно ќе положи и цвеќе на спомен обележјето на загинатите припадници на АРМ, поставен пред Командата во касарната.
Хеликоптерот Ми-17 се урна на 12 јануари 2008 година во услови на магла на локација кај катлановско Блаце. Во несреќата загинаа потполковникот Тони Спасовски, мајорот Горан Ристовски, капетаните Бране Спасовски и Игор Ѓорески, заставниците Славчо Василев и Тони Давитковски, постарите водници Јанко Шириќ, Мики Ивановски, Александар Тасковски и Александар Васиќ и десетарот Златко Вељановски.