Службата за борба против финансирање на тероризмот и перењето пари при француското министерство за економија соопшти дека идентификувале од 150 до 200 „тајни банкари“ на Исламска држава, воглавно во Либан и во Турција.
Директорот на службата Бруно Дале денеска го објави извештајот.
– Овие тајни банкари на ИД добиваат средства кои се јасно наменети за одржување во живот на организацијата, изјави Дале и нагласи дека главниот предизвик за неговата канцеларија сега е да се лоцираат нови собирачи на средства за ИД, која се повеќе зависи од надворешно финансирање.
Џихадистите биле лишени од основните извори на финансирање со губењето на териториите во Ирак и Сирија. Главни извори им биле уцените на населението и масовните грабежи, а групата се обидува да ги компензира овие загуби со финансирање од странство, се наведува во извештајот.