Мајката, која е осомничена дека вчера со нож ги избодела своите три деца во семејната куќа во Таненг, оставила писмо, јавуваат француските медиуми.
Ова писмо е главниот фокус на истрагата бидејќи полицајците се обидуваат да го разберат мотивот зад ова тројно убиство.
Според информации блиски до француската полиција, по мајката интензивно се трага, а постои сомневање дека се крие некаде во падините на Алпите.
– Во моментов сослушуваме неколку членови на потесното семејство, а по мајката се уште интензивно се трага, рече обвинителот Борис Дуфо.
„Обдукцијата и дополнителната евалуација ќе ги направи Медицинско-правниот институт Гренбол, но веќе е официјално дека сите тројца починале од убодни рани“, додаде обвинителот.
Извор близок до случајот тврди дека мајката оставила писмо, за кое постои сомневање дека е проштално писмо, но содржината се уште не е позната.
Да потсетиме, таткото синоќа ги пронашол своите деца – две момчиња на возраст од 2 и 11 години и едно девојче (13) – мртви во нивната куќа во Таненг, ски-центар во близина на француската граница со Швајцарија.
Мајката, за која локалните медиуми јавуваат дека боледувала од депресија, моментално е исчезната и се смета за главен осомничен за трагедијата.