Денеска, во Скопје се одржаа политички консултации меѓу Министерствата за надворешни работи на Република Македонија и на Босна и Херцеговина.
Политичките консултации ги водеа заменик министерот за надворешни работи на Република Македонија, Арта Точи и заменик министерот за надворешни работи на Босна и Херцеговина, Јосип Бркиќ.
Точи изрази уверување дека пријателските односи меѓу двете земји ќе го одржат позитивниот тренд на развој и ќе се збогатат со нови содржини од заемен интерес.
Соговорниците констатираа одлични билатерални односи, потврдени со засилената динамика на размена на посети на високо и највисоко ниво, заемните заложби за збогатување на соработката во сите области од заемен интерес, особено во делот на европските и евроатланските интеграции на двете земји.
Економската димензија на билатералната соработка беше особено акцентирана дотолку повеќе што постојат можности и заемен интерес за нејзино унапредување.
Во оваа смисла, се подвлекоа напорите на двете Влади за креирање поволни можности, меѓу кои, воведување на авио линија Скопје – Подгорица – Сараево, олеснување на патувањето на граѓаните на двете земји со биометриски патни исправи, меѓусебно признавање на возачките дозволи и др.
Соговорниците разменија мислења и за актуелните состојби во двете земји, како и за актуелните регионални и меѓународни случувања.