Новиот претседател на ССМ, Дарко Димовски вети дека ќе ги врати работничките права, загарантираната плата и достоинството на работниците. Овие три се целите кон чија реализација ќе се стреми.
Димовски најави и консолидација на синдикатот, како и реформи кои се неопходен процес.
– Мојот мандат е многу краток и ќе трае две години бидејќи ова е вонреден конгрес и затоа ќе се фокусираме на овие три цели – враќање на работничките права, загарантираната плата и враќање на достоинството. Реформите се неизбежни во Сојузот на синдикати, но тоа е наш интерен проблем којшто ние заеднички ќе го решиме, изјави Димовски.
Тој изјави дека изборот бил најдемократски и дека добил поддршка од 68 од вкупно 108 делегати.
Делегатите од синдикатите кои му дадоа поддршка на Пецо Грујовски го напуштија Конгресот во моментот кога требаше да се гласа, а Грујовски во кратка изјава за медиумите оцени дека се работи за најконтроверзниот конгрес и оти изгубил Синдикатот и работниците.