Министерот без ресор задолжен за имплементација на Стратегијата за подобрување на состојбата на Ромите во Република Македонија, Самка Ибраимоски денеска на прес-конференција истакна дека вчера е објавен конкурсот за доделување стипендии во пет категории за ученици Роми запишани во прва, втора, трета и четврта година во јавните и приватните средни училишта за учебната 2017/2018 година.
Станува збор за 752 стипендии кои ги доделува Министерството за образование и наука со финансиска поддршка од Ромскиот образовен фонд од Будимпешта за учебната 2017/2018 година, од кои 353 се предвидени за средношколци Роми корисници на стипендии од учебната 2016/2017 година кои го задржале просекот од минимум 3.00 во четири категории.
– Во првата категорија се доделуваат 107 стипендии за талентирани средношколци Роми за постигнат успех од 4.50 до 5.00 во висина од 2.200 денари месечно. Во втората категорија се доделуваат 155 стипендии за постигнат успех од 3.50 до 4.49 во висина од 1.500 денари месечно, во трета категорија – 74 стипендии за постигнат успех од 3.00 до 3.49 во висина од 1.000 денари месечно и во четврта категорија 17 стипендии за ученици со посебни образовни потреби со успех од најмалку 3.00 во висина од 1.000 денари, рече Ибраимоски.
