Европскиот пратеник Иво Вајгл денеска пред македонската јавност го презентираше проектот на Европскиот парламент насловен „Жан Моне“ кој што треба да овозможи отворен разговор меѓу сите македонски партии и Европскиот парламент.
– Институтот „Жан Моне“ овозможува интеракција помеѓу Европскопт парламент и Националниот парламент на Република Македонија. Со отворена дебата можат да се надминат проблемите, рече европратеникот.
Вајгл напомена дека „Жан Моне“ не е замена за Пржинскиот договор и неговата цел е подобрување на функционирањето на Парламентот.
– Во мојот претстој во Македонија почувствував позитивна енергија помеѓу партиите односно меѓусебно разбирање дискусија и желба државата да тргне напред, кажа Вајгл.
Европратеникот изјави дека за ЕУ е важно да знае како се одвиваат работите во Македонија и истакна дека ЕП го поддржува проширувањето на Европската унија.
– Важно е што Македонија ги започна промените и спроведувањето на овие реформи ќе помогне за отпочнување на разговори за влез на земјата во ЕУ, рече Вајгл.
Toj кажа дека иако сите извештаи од Република Македонија не се разгледуваат во ЕП, сепак грижата на ЕУ е Македонија да остане сфера на интерес.
Првиот разговор Иво Вајгл рече дека треба да се одржи при крајот на јануари наредната година во Франција, во куќата на Жан Моне.
На новинарското прашање како би присуствувале сите партии на оваа дебата, кога некои од лидерите, конкретно на Никола Груевски му е одземена патната исправа, Вајгл одговори дека на разговорот не мора да присуствува лидерот, туку само еден координатор од пратеничката група на партиите, еден член и еден службеник.
Во врска со „крвавиот“ четврток, европратеникот рече дека не секогаш различното мислење на политичкиот опонент значи дека имате непријател и дека 27. април е болно искуство за сите, за што партиите ја научиле лекцијата и сега се спремни да разговараат меѓу себе.
Виктор Јованов